捷球网-足球比分_篮球比分_即时比分直播_足球视频移动版

車路士美國之旅展開，新帥普捷天奴上任首場熱身賽，將會對英乙球隊域斯咸，車路士今夏由頭換到落腳，今仗「新車落地」除咗試陣，喺美國班主保利地頭出擊肯定唔衰得，點都要入多幾球，而對手域斯咸踢法以攻代守，大家等睇入球騷。（周四早上7時30分開賽）

經過動盪一季，車路士今季大換血，上至領隊下至職球員都有大改動，舊將艾斯派古達、尼高路簡迪、基斯甸普列錫、高華錫、美臣蒙特同夏維斯等人離隊，主要收購就有尼干古同尼高拉斯積遜，陣容變得精簡兼煥然一新。

英乙域斯咸等做「強隊沙包」
今次美國集訓，尼干古同梅迪歷暫時唔出住，但佢哋陣容仍然豪華，預計普捷天奴會派強陣，防線重用阿列沙巴拿加把關，堤亞高施華拍住芝維爾同列斯占士，中場就有安素費南迪斯同干拿加歷查孭重飛，前鋒史達寧同外借收回嘅赫臣奧杜爾，就會同新加盟嘅尼高拉斯積遜合作攻堅。

域斯咸今季新升上英乙，擁有前曼聯門將賓科士打，佢哋今次美國集訓硬仗連場，除咗今場挑戰車路士，之後仲會同曼聯交手，擺明做「強隊沙包」，佢哋上季46場攻入116球，踢法進取，近9仗7次開3球或以上，今場入波唔會少。