瑞典超依家出現3強鼎立局面，赫根、艾夫斯堡同馬模被視為冠軍熱門，本來形勢最好嘅馬模上輪意外輸波，依家跌到落第3位，周二凌晨前列大戰作客硬撼排第4位嘅佐加頓斯，同樣係危機四伏，今場開出平手盤，佐加頓斯值得捧場。（周二凌晨1時開賽）

馬模今季開局順利，不過自從主力前鋒維基亞受傷後，球隊鋒力受到影響，上仗主場對米贊比雖然有超過7成控球率，但埋門把握始終差勁，最終輸1比2痛失爭標關鍵3分，球員嘅信心亦受到打擊，今仗要作客更加不宜睇高。

近7聯賽5勝2和
主隊佐加頓斯係瑞典目前狀態最好球隊，近7場聯賽錄得5勝2和，對上5仗主場賽事更只失過兩球，無論進攻同防守都好有保證。再者，佐加頓斯近年專剋馬模，對上5次聯賽交鋒，佐加頓斯取得4勝1和佳績，今仗有望再贏一次，平手盤揀得過。