朝有場智甲獨腳戲，由卡拉雷聯主場鬥馬加蘭斯。卡拉雷聯排名雖然高啲，但近況認真麻麻，近7仗僅獲1勝；榜尾馬加蘭斯近期積極搶分，已經5場不敗，作客亦有力抗衡。雙方近6次交鋒，有5次總入球開2球或以下，中位數2.5球嘅入球細好路。

（周六早上5時57分開賽）

卡拉雷聯近期陷入低潮，上仗作客以2比1擊敗維拿迪馬愛華頓，總算結束6場不勝頹勢。但其實佢哋贏得好驚險，控球率得28%，一度被對手壓住嚟砌，要到補時先靠後衞靴蘭盧比斯助攻射入致勝球，攞到3分有啲幸運成份。

卡拉雷聯主場火力弱

卡拉雷聯目前位處中遊，佢哋今季聯賽主場踢咗8場波，只得2勝4和2負，勝率僅25%，夾埋入得9球，認真靠唔住。事實上卡拉雷聯近6場聯賽主場未贏過，4和2負之餘只入3粒，一班射手明顯冇晒辦法，想搵入波唔係咁易。

馬加蘭斯近期有反彈趨勢，近5仗取得2勝3和，防守尤其有改善，不過攻力仍然一般，上仗主場踢到87分鐘先憑新兵拉雲尼入開齋波，逼和紐柏萊斯1比1，加上佢哋近6場聯賽作客僅1勝，預料今仗都會保守為上，以1分做目標，唔會急於冒進以免得不償失。既然雙方冇乜板斧，一於博入球細。