阿歷絲摩根鍊盡博開齋

目前E組形勢，美國同荷蘭首兩輪1勝1和同得4分，當中荷蘭最後一輪對已出局嘅越南，和波都可以出線，形勢最有利。至於美國同葡萄牙就要正面交鋒，展開生死戰，兩仗錄得1勝1負嘅葡萄牙贏波先能夠出線，和波就好大機會出局，至於美國只要唔輸就可晉級，不過以佢哋超強戰力，相信唔會玩嘢，盡早穩住勝局最實際。

近年對葡萄牙旺半勝

作為4屆盟主，美國首仗3比0輕取越南，有個好開始，不過上場只能逼和荷蘭1比1，表現唔合格，今仗自然不敢怠慢，避免陰溝裡翻船，美國左路進攻拍檔索菲亞史密絲及蓮絲莉賀蘭今屆各累積兩球，但係王牌前鋒阿歷絲摩根今屆至今僅交出1個助攻，更曾喺首仗對越南射失12碼，今仗定必力爭「開齋」，預計美國早段就會展開猛烈攻勢，既然美國近4次對賽3次半場勝，今仗半W機會甚高。