作客同白禮頓鬥攻
同晚另一場英超爆發「紅白大戰」，白禮頓主場迎戰利物浦，白禮頓踢法積極主動，入波多失波亦多，近7仗聯賽全開4球或以上。利物浦上仗聯賽9人應戰下慘負熱刺1比2，此仗可見「紅軍」攻力甚強，預計將同「海鷗」鬥攻，入球騷可期，捧3.5球入球大。（Now 621及611周日晚9時直播）

「海鷗」白禮頓踢法有前冇後，極富娛樂性，睇番佢哋今季表現，既能擊敗紐卡素同曼聯，卻又輸畀韋斯咸同阿士東維拉，其中上仗聯賽鬥維拉雖然大敗1比6，但球員踢到最一刻仲諗住進攻，上周中歐霸盃作客馬賽一樣照攻，結果喺半場落後兩球之下逼和2比2，相信佢哋今場踢法唔會改變，繼續搶攻。

三箭齊發搶士哥
利物浦上仗不敵熱刺，聯賽不敗身被破，但其實佢哋輸波同球證誤判有莫大關係，賽後亦鬧出唔少風波。「紅軍」上下谷埋一肚火，會用表現嚟證明自己，佢哋今仗有居迪斯鍾斯同迪亞高祖達停賽，前鋒加普受傷缺陣，幸好兵源足夠調動，上周中歐霸盃開齋入波嘅賴恩格雲貝治，將繼續獲重用，前鋒線亦有穆罕默德沙拿、達雲紐尼斯、路易斯迪亞斯三箭齊發，對住中門大開嘅白禮頓，肯定大把波入。