歐國外J組，波斯尼亞主場迎戰已出線嘅葡萄牙，波斯尼亞現時排第4，無奈陣容老化，想谷都谷唔起。至於葡萄牙已經達成出線任務，餘下賽事將會試陣，但陣容同樣星光熠熠，而且佢哋攻力強兼踢法積極，近7仗6次半場領先，直取半場客勝。■（周二凌晨2時45分開賽）

波斯尼亞嚴重老化
波斯尼亞雖然仲有出線機會，但最後3輪分別要對榜首葡萄牙、小組第3嘅盧森堡同第2嘅斯洛伐克，可謂場場生死戰，佢哋最大問題係嚴重老化，仲要靠37歲前鋒迪斯高同33歲中場比真歷支撐大局，實在唔值得睇好。

葡萄牙已經出線，上仗對斯洛伐克梅開二度嘅C朗估計會被收起，會畀班小師弟落場，但睇番佢哋陣容仍然強勁，例如上仗開紀錄嘅干卡路拉莫斯、祖奧菲歷斯、魯賓尼維斯，同樣係入球保證，呢班球員為討好新帥馬天尼斯爭取入選明年決賽周，更加唔會放軟手腳，佢哋近期半場領先嘅攤路，照跟冇壞。