今晚歐聯G組第3輪賽事，衞冕嘅曼城作客年青人。曼城狀態麻麻之餘，射手艾寧夏蘭特喺歐聯仍然陷入球荒，而且每逢歐聯初段例必踢得保守，年青人遇強更加唔敢輕舉妄動，1.5球半場細更可取。（Now聽645周四凌晨3時直播）

曼城日前聯賽擊敗白禮頓2比1，總算止跌，不過各項賽事近5仗只得2勝3負，狀態認真一般。雖然射手艾寧夏蘭特上仗對白禮頓遠射得手，打破之前3仗入球荒，但原來呢位挪威神鋒近5仗歐聯竟然全部食白果，腳風欠順，愈急就愈唔入，始終好拍檔兼中場核心奇雲迪布尼養傷後，夏蘭特總係冇咁得心應手。

年青人死守輸少當贏
年青人頭兩輪只係得1和1負，儘管表現唔算差，但兩仗都係喺上半場先失波，今遇勁旅曼城一定會小心為上，加上兩位前鋒薛迪伊登同贊皮耶尼沙美，甚少一齊披甲，意味住佢哋都採用較保守戰術，就算贏唔到曼城，都希望可以減少失波，輸少當贏。

另邊廂，雖然曼城頭兩輪歐聯全勝，但佢哋出戰聯賽、歐聯部署略有不同，聯賽通常會踢得進取唔會縮，相反踢歐聯就會以穩陣行先，尤其喺比賽初段，連同上屆在內，近7仗半場有6次開1球或以下，而且佢哋近6仗歐聯作客只得2勝4和，確係求穩居多，相信初段唔慌多波入，1.5球半場細有計