今晚喺溫布萊球場爆發英冠附決賽，由高雲地利火併盧頓，爭逐最後一張升上英超入場券。兩支老牌球隊於低組別聯賽沉淪多時，難得有機會衝超掘金，一定會小心翼翼，加上大家比賽初段踢得特別保守，半場和值得捧場。

（有線661及601台周六晚11時45分直播）

高地喺2001年降班後一沉不起，2016年更跌到落英乙。好彩1年後有羅賓斯回巢執教，帶領呢支飽受財困嘅老牌球隊走出深淵，今季喺英冠位列第5位，並於英冠附4強淘汰米杜士堡。另邊廂盧頓喺英超成立前一季、即1992年從當時頂級聯賽英甲降班，更一度混迹非職業聯賽。繼上季英冠附4強不敵哈特斯菲爾德後，今季捲土重來，羅拔艾華斯率領球隊取得第3名，並喺英冠附4強反勝新特蘭。

升班關鍵戰穩陣行先
邊隊升班英超，將視乎排名帶來1.35億（約13.1億港元）至2.65億鎊（約25.7億港元）嘅收入增長，絕對係發財好機會，因此呢場決賽雙方難免會小心為上。睇番高地近3仗全開半場和，盧頓近4仗亦有3次半場同對手未分勝負，初段雙方都以穩陣行先，半場和不妨追多鋪。