英超今晚煞科，持續多個月嘅榜尾護級大亂鬥踏入最終章，來到大審判日，3支護級球隊主場出擊，列斯聯激鬥熱刺，李斯特城火併韋斯咸，愛華頓迎戰般尼茅夫，3隊只能活1隊！據統計，1個英超席位，至少值1.7億鎊（約16.5億港元），3場大戰、1個名額，勝者續戰英超，敗者損失慘重，最後時刻，誰能死裏逃生？

列斯聯焗攻博大霧
英超煞科戰重頭戲，列斯聯主場迎戰熱刺，排尾二嘅列斯聯今仗必須贏波先至有機會保住英超席位，肯定豁出去搶攻。熱刺亦要為歐協聯席位搏殺，加上列斯聯近4場聯賽總入球全開3球或以上，一於再追中位數2.5球嘅入球大。（Now聽622周日晚11時30分直播）

列斯聯現時同尾三李斯特城同分，但得失球差比對方少9球，同時落後尾四愛華頓2分，換言之，列斯聯今仗必須贏波，加上愛華頓、李斯特城同時失分，先至有望逃離降班區，形勢非常被動。

來到煞科戰，列斯聯惟有盡最後努力爭取贏波，預料會採取積極踢法。事實上，列斯聯攻力唔弱，早前主場同前列強隊紐卡素打和2比2，甚至作客亦能喺曼城身上取得入球，無奈防線不穩，以致往往得不償失。

熱刺為踢歐協聯搏盡
至於熱刺落後第7位維拉1分，今仗亦要爭取贏波，並寄望維拉失分，先至可以奪取下屆歐協聯入場券。雖然熱刺成績倒退，但射手哈利卡尼仍保持水準，今季聯賽已有28球進帳，配合孫興民，要攻破列斯聯防線並唔困難。翻查雙方近8次交鋒，總入球都達3球或以上，2.5球嘅入球大值博。