兩支次名出線球隊交手，厄瓜多爾U20對南韓U20。厄瓜多爾U20能夠於B組出線，全因抽到好籤，佢哋攻力不足，防守亦唔集中，近6仗有4場被對方攻破防線；南韓U20攻力不俗，今仗有望首先取得入球，一於推介南韓U20「第一隊入球」。

（周五清晨5時開賽）

厄瓜多爾U20一味靠守
厄瓜多爾U20由外圍賽開始，一路都好運到爆，有別於傳統南美球隊，佢哋青年軍攻力麻麻，一味靠守，今年U20美洲國家盃9戰僅2勝，只係入得8球，跌跌碰碰咁入嚟決賽周。入到決賽周又好籤運，分組賽同組除了美國實力較強，斯洛伐克U20及斐濟U20屬賽事稀客，厄瓜多爾U20分組賽雖然錄2勝1負，但其中兩場均先失波，累積近6戰更有4場先被對方攻入。

南韓U20近年於青年級賽事屢創佳績，上屆世青盃就殺入決賽勇奪亞軍，晉級過程中，「小太極虎」曾於4強戰以1比0擊敗厄瓜多爾U20，今場心態上亦佔優。

南韓U20今屆暫時射入4球，全由不同球員攻入，包括外流葡萄牙嘅前鋒金永克，呢名射手喺外圍賽已經光芒四射，決賽周亦孭得起球隊，已經成為列強目標。南韓U20擁有多個炮台，令對手防不勝防，面對厄瓜多爾U20有權先取得入波，南韓U20「第一隊入球」玩得過。