亞洲盃B組最後一輪，實力強橫嘅澳洲對烏茲別克。澳洲2戰全勝已經提前出線，1勝1和嘅烏茲別克排小組次席，今仗只需拎1分即可鎖定16強，就算輸波都有機會保住次名，冇必要同澳洲硬碰，相信會穩陣行先，2.5球嘅入球細值博。（HOY TV 76台周二晚7時30分直播）

烏茲別克拎1分鎖定次名
澳洲被視為有力爭冠球隊，整體戰鬥力強勁，上輪1比0小勝敍利亞後錄得6連勝，不過佢哋踢法其實頗為保守，戰術以不失球為大前提，上半場多數靠控球在腳消耗對方體力，每場入波多數1球起、2球止，近7場比賽有6次總入球開2球或以下，但求穩陣贏波。

烏茲別克目前領先第3名嘅敍利亞3分，得失球亦有4球優勢，所以今仗就算輸波，亦有機會保住次名，面對強大嘅澳洲自然唔會冒險搶攻，相信會全力堅守城池。以烏茲別克近3仗不失球嘅堅韌防守力，2.5球入球細信得過。