世青盃奪標熱門烏拉圭Ｕ20，4強將會接受決賽周新丁以色列Ｕ20挑戰，爭奪決賽資格。烏拉圭踢法主動，今屆踢5場全部有波入，不過以色列今屆表現紀律性十足，防守穩健，今屆5場賽事有4仗開出半場和，不妨再追多一次。（周五凌晨1時30分開賽）

棄硬碰屯兵死守
烏拉圭Ｕ20世青盃往績彪炳，近4屆全入淘汰賽，2013年更取得亞軍，球隊踢法主攻，今屆5戰全部取得入球，合共射入對手10球，佢哋厲害之處，係個個球員都可以肩負入波責任，現時射手榜頭7名都無烏拉圭球員份，證明佢哋唔使靠死個別球員。

事實上，除咗決賽周賽事，烏拉圭喺外圍賽同樣顯示非凡攻力，9場外圍賽只有對住巴西入唔到波，預料以色列Ｕ20唔會同佢哋硬碰硬，肯定會屯重兵守住後防。

近５場４次半場0:0
以色列Ｕ20首次殺入決賽周就能夠殺入4強，全憑穩健防守及富紀律性踢法，將對手進攻威力減至最低，效力國內聯賽球隊尼坦亞馬卡比嘅門將杜馬沙法迪絕對係晉級功臣，佢喺分組賽作出16次撲救，演出優異，而以色列Ｕ20今屆5場賽事4次半場開出「0比0」，另一場都係守到上半場補時兩分鐘先畀日本攻入，今場不妨再追半場和。