另一場英足盃焦點戰，車路士主場迎戰英冠嘅列斯聯。車仔啱啱失落英聯盃，勢必會喺英足盃搏命；列斯聯忙於爭升班，無暇兼顧盃賽，主勝穩開。（無綫myTV聽SUPER周四凌晨3時30分直播）

最後捧盃希望必搏
車仔於日前英聯盃決賽，有天價中場安素費南迪斯及摩西斯卡些度壓陣下，對住「紅軍二隊」竟要激鬥120分鐘，最終仲喺末段失守輸0比1，成為英格蘭足球史上首支連續6次本土盃賽決賽輸波球隊，冇晒飛士。車仔近兩季使咁多錢，依家喺聯賽只係排緊第11位，想力爭上游爭踢下屆歐洲賽機會唔大，今季最後一個捧盃目標，就剩番英足盃，為挽回面子一定搏。

另邊廂，列斯聯依家喺英冠位居次席，頭號目標當然係重返英超，近9場聯賽更錄得全勝，弗到漏油。不過與聯賽戰意鮮明相比，列斯聯對爭盃賽嘅態度截然不同，好似上圈英足盃對住同級嘅普利茅夫，以副選為主出戰，要重賽兼打到加時先至獲勝，似乎唔多上心。翻查紀錄，車仔喺英足盃近12次面對非英超球隊均順利晉級，法定時間獲11勝1和，而且近4次與列斯聯交手，亦錄得3勝1負，明顯佔上風，有力贏波一洗日前失冠頹風。