周日日職壓軸之戰，川崎前鋒主場對廣島三箭，川崎前鋒取得2連勝，但對手都係弱隊，不宜高估，今仗遇上前列球隊廣島三箭，贏波把握唔大。至於三箭作客表現往往大打折扣，預料會先做好防守，避免先失波，一於再追半場和。（周日晚6時開賽）

火力不足難搶韁
川崎前鋒早前曾經歷3連敗，雖然近兩仗都勝出，似有反彈迹象，但要留意呢兩場勝仗對手分別係日職護級分子柏雷素爾，以及喺天皇盃擊敗地區球隊櫪木市FC，成績有「水份」。事實上，睇番川崎前鋒近7場聯賽主場僅2勝3和2負，合共只入7球，換言之平均每場入1球，今仗要攻入廣島三箭防線，並唔容易，加上要提防對手打反擊，預料上半場唔會冒進。

另一邊廂，廣島三箭同樣取得2連勝，但都係主場賽事，佢哋離開自己地頭就冇料到，近4場作客比賽都輸波，只入兩球，恐怕難以對川崎前鋒構成太大威脅。球隊若要爭標，必須盡快改善作客成績，預料今仗會以不敗為前提，爭取客場「止血」。加上三箭經常留前鬥後，近5場聯賽上半場都打和，其中4仗上半場踢成0比0，半場和值博。