歐聯第2輪上演強弱懸殊賽事，斯洛伐克球隊施洛雲主場迎戰「藍月亮」曼城。「魚腩球隊」施洛雲實力疲弱，首輪歐聯作客些路迪大敗1比5，今場對住比些路迪高好多級嘅曼城，直情係待宰肥羊，預計會出現大量入球，曼城客勝冇分頭，留意到佢哋近2次歐聯作客半場全開2球或以上，1.5球半場大放心捧。（Now聽639周三凌晨3時直播）

曼城首輪被國際米蘭悶和0比0，搞到窒住度氣，之後喺聯賽連和2場，上場被紐卡素逼和1比1一役，連艾寧夏蘭特都交白卷，可以話谷埋一肚火。

施洛雲豆腐防線守唔住
今屆歐聯改制，歐洲足協放寬隊數到36隊，連施洛雲呢啲未夠班球隊都有得玩，首次見識歐聯呢啲大場面，對住些路迪即刻輸鑊甘，今場遇着超班嘅曼城，更加冇得打；相信曼城贏波問題不大，領隊哥迪奧拿亦唔會玩輪換，反而會利用今場「撻番着副偈」，畀幾位射手放任進攻，盡情數胡，以夏蘭特同謝利美杜古嘅級數，應該可以輕易撕破施洛雲條豆腐防線，上半場只係要求入兩粒，相信好易到數。