今晚英聯盃16強重頭戲，熱刺主場鬥曼城。論實力曼城無疑秤先，但佢哋重心放晒喺英超及歐聯身上，英聯盃隨時派副選出擊。熱刺上場英超輸波，球員現疲態，主場都冇甜頭。雙方近4次對賽，3次總入球開2球或以下，再追中位數3.5球入球細。（無綫myTV SUPER周四凌晨4時15分直播）

熱刺近4次主場全勝，好大程度因對手實力一般，佢哋今季唯一一場主場敗仗，就係輸畀死敵阿仙奴，今日遇上另一勁旅曼城，預計領隊普斯迪高路會放棄一貫主攻踢法，避免失波，加上近期賽程頻密，球員體力負荷極大，自然要減慢節奏。熱刺跨屆近5場英聯盃法定時間只有1勝，當中3場冇波入，難以攻入曼城大門。

曼城唔重視畀主力抖抖
曼城上場英超小勝修咸頓1比0重登榜首，但攻力明顯不及往昔。英聯盃對佢哋嚟講只屬「雞肋」，預計艾寧夏蘭特及菲爾科頓等主力會獲得休息。曼城上輪英聯盃對屈福特，領隊哥迪奧拿就排出「無鋒陣」，影響入球能力，今晚入波唔慌多。文:Mic少