美職周中快車上演「洛杉磯打吡」，洛杉磯銀河主場迎戰FC洛杉磯。球員踢打吡戰向來特別肉緊，尤其「洛杉磯打吡」係全國焦點，更加不容有失，近年對碰雖然互有勝負，但肯定超多波入，近5次交手4次開4球或以上，今場玩入球大，等睇入球騷。（周三早上10時30分開賽）

美職依家個個都等美斯首演，查實最早引入星戰嘅係洛杉磯銀河，當年搵碧咸加盟轟動全球，依家「萬人迷」做咗國際邁亞密老細，就到佢整單美斯加盟。

可惜此一時、彼一時，現時嘅洛杉磯銀河星味一般，查維亞靴南迪斯同杜格拉斯哥斯達叫做有啲名，不過隨住年紀愈大，表現亦愈嚟愈失色，「小豆」今季更傷過多踢，今場「洛杉磯打吡」佢亦因傷倦勤。銀河經過早前聯賽3連敗後，近期狀態算係好番啲，近4場美職全部和波，不過仍然排西岸尾二。

近年對賽旺入球騷

衞冕雙料冠軍嘅ＦＣ洛杉磯，最近連輸兩場，不過佢哋鬥銀河往績唔錯，今場心理上唔怕同銀河搶攻，而且佢哋擁有卡路士韋拿攻堅，呢名墨西哥射手係「洛杉磯打吡」入波最多球員，自2018年加盟ＦＣ洛杉磯後入過12球，比次席嘅伊巴謙莫域多3粒，而且今場仲有機會將紀錄進一步增加。翻查紀錄，兩隊對碰好多波入，近5次交手4次開4球或以上，今場玩3.5球入球大啱數。