英超聖誕「拆禮物日」好波連場，「曼市雙雄」曼城及曼聯分途出擊，兩隊淪為「難兄難弟」近期成績同樣差劣。來到大時大節，實在唔可以再令球迷失望，勢必搏盡力求大翻身，為支持者報佳音。

藍月細弱咬唔入拖肥
英超聖誕快車啟動！快車第一站早場，曼城主場迎戰愛華頓。「藍月亮」近況疲弱，連場失分後跌出聯賽三甲，當務之急係改善表現，對手「拖肥糖」防守穩健，加上近日賣盤成功有助提升士氣，今場有望搶分；留意到近年相遇都係冇乜波入，入球細3.5球機會高。（Now 621周四晚8時30分直播）

曼城近期攻守表現急跌，雖然偶有反彈演出，但走勢仍然持續向下，例如早前聯賽「曼市打吡」不敵曼聯，雖然早段領先，但進攻上遲遲未能取得「保險球」，戰至末段最終連失兩球落敗，對球隊士氣打擊特別嚴重，上場輸畀阿士東維拉更係頹爆。主帥哥迪奧拿面對執教生涯前所未有危機，至今一籌莫展，今場就算有主場之利都不宜高估。

愛華頓擺脫財困士氣盛
愛華頓於聖誕快車開始前收到最佳禮物，就係終於賣盤成功，獲美國新投資者佛烈金集團接手，新班主同時擁有意甲球隊羅馬，對球隊成績有一定要求，而對愛華頓最大改變係終於擺脫困擾多年嘅財政問題，球員可以專心比賽。

至於技術層面上，愛華頓向來擅守，強如阿仙奴都能守和0比0，宣布賣盤後對住如日方中嘅車路士一樣悶和「窿窿」，遇上攻力倒退嘅曼城，更加有把握守到尾，加上雙方近6次交手5次開3球或以下，3.5球嘅細盤係最佳選擇。■邪神

紅魔防線穿窿大盤啱數
曼聯今晚英超作客狼隊，「紅魔鬼」領隊魯賓艾摩廉「蜜月期」已過，球隊打回原形，遭遇2連敗，防線弱不禁風，近2仗合共失7球，恐怕今場難保清白之身。狼隊有「新帥效應」加持，重拾士氣及信心，為搶分護級，必定豁出去一搏，以狼隊近6場聯賽總入球全開3球或以上嘅走勢，一於再追中位數2.5球嘅入球大。（Now 621周五凌晨1時30分直播）

狼隊護級主場放膽攻
排聯賽尾三嘅狼隊捲入降班漩渦，會方早前宣布換帥，解僱加利奧尼爾，聘請域陀佩利拉執教，果然立竿見影。呢位56歲葡萄牙籍主帥，上仗領軍第一擊，以3比0大勝護級對手李斯特城，令軍心大振。事實上，狼隊以葡萄牙球員及葡語系巴西外援為骨幹，同域陀佩利拉同聲同氣，有助建立凝聚力，遇上陷入低潮嘅曼聯，應該會放膽主攻。

曼聯由魯賓艾摩廉接手執教後，進攻有改善，翼鋒阿密特迪亞路狀態大勇，激活右路側擊力。加上艾摩廉棄用踢法散漫嘅前鋒拉舒福特，亦有助提升進攻效率，近期代表作一定係英超作客以2比1擊敗曼城。不過，曼聯改用3後衞陣式，球員仍未適應，導致防線出現頗多漏洞，早前英聯盃被熱刺攻入4球，以3比4落敗，上場英超更加吞般尼茅夫3蛋。艾摩廉領軍9場比賽以來，曼聯僅得1場冇失波，其中7場總入球開3球或以上，隨時同狼隊合演入球騷。■ Mic少