周六澳職賽事，中岸水手主場迎戰「神奇球隊」奧克蘭FC。澳職新軍奧克蘭FC一鳴驚人，開季8場賽事取得6勝，雖然上輪輸畀西部聯被破不敗身，但對奧克蘭FC球員可視為當頭棒喝，相信重整心態後，可以重新踢出開季嘅機動性同團結表現，客勝仍值得睇好。（無綫myTV SUPER周六下午2時直播）文:工廠仔

水手球迷柴台士氣曳
奧克蘭FC開季表現出色，頭7輪聯賽6勝1和，上場突然失準輸波，教練哥列卡承認球員畀成功沖昏頭腦，已對球員重新進行心理建設。哥列卡表明今場會變陣出擊，可望重現季初嘅高效率，佢哋近3場作客有2場保持不失，有力穩中求勝。

中岸水手戰績差勁，近5場比賽只得1勝1和3負，球員士氣低落，而且引起球迷極度不滿，喺主場作戰反而令球員感受到壓力，影響演出。中岸水手近4場主場1勝3負，而且3場敗仗合共狂吞11蛋，面對決心十足嘅奧克蘭FC難逃一敗，一於捧客勝。