周五澳職大戰，阿德萊德聯主場迎戰西悉尼流浪者，「阿聯」攻力強勁，今季8場聯賽合共轟入20球，屬於各隊之冠。至於「西流」以19個入波緊隨其後，兩支最強火力球隊交鋒，勢必大手交易。睇番西悉尼流浪者近6場聯賽有5次總入球開出4球或以上，中位數3.5球嘅入球大值得追捧。（無綫82台周五下午4時35分直播）

上次對壘共轟７粒
阿德萊德聯上季澳職只獲得第8名，但今季表現脫胎換骨，現時排第2位，僅比榜首奧克蘭FC少1分。「阿聯」唔只成績大躍進，而且踢法充滿娛樂性，頻頻創造大比數賽果，其中近2場分別大勝中岸水手4比0，以及打和FC悉尼3比3。阿德萊德聯最煞食係多位中前場球員具備上乘射術，前鋒阿奇葛雲、盧卡祖雲域奴、派利亞斯、中場克勞夫、史提芬莫克分別有2球或以上進帳，入波球員分布平均，可以話係周身刀、張張利，今仗配合地利優勢，肯定繼續強攻對手。

講到進攻多元化，西悉尼流浪者亦不遑多讓，上仗以4比1大勝威靈頓鳳凰，4個入波分別由4位球員射入。前鋒尼高拉斯米蘭奴域以5個入波，同威靈頓鳳凰中場巴巴路西斯並列射手榜第1位，「西流」絕對有能力同「阿聯」鬥攻。而事實上，兩隊曾經喺11月初對壘，合力製造咗7個入球，阿德萊德聯最終贏4比3，今次碰頭好大機會再演入球騷。