捷球网-足球比分_篮球比分_即时比分直播_足球视频移动版

今晚英超早場上演「倫敦打吡」，車路士主場迎戰富咸，兩隊同樣於周中英聯盃輸波，但富咸不敵勁旅利物浦，雖敗不辱，反觀車仔輸畀英冠球隊米杜士堡，實在非常失禮，加上鋒線球員腳頭無靈，今仗要攻入對手大門，並非易事。翻查雙方近5次聯賽交鋒，有4次總入球開2球或以下，最好揀中位數2.5球嘅入球細。

（Now聽621周六晚8時30分直播）
車路士上仗英聯盃4強首回合作客0比1不敵米杜士堡，高爾彭馬面對空門都射唔入，腳風非常唔順。事實上，鋒線屬於車仔最弱一環，早前復出嘅進攻中場尼干古又受傷，前鋒尼高拉斯積遜離隊踢非國盃，領隊普捷天奴上仗安排高爾彭馬擔任「假9」，實屬無奈之舉，而且效果欠佳，可見呢位阿根廷主帥已經技窮，遇到踢法硬淨嘅富咸，唔好話贏波，甚至想入波都有難度。

富咸硬淨謀定後動
富咸上仗英聯盃領先之下，僅以1比2不敵英超一哥利物浦，表現備受認同。富咸遇上倫敦球隊，往往有出色發揮，包括今季英超兩次鬥阿仙奴，取得1勝1和，並喺英聯盃淘汰熱刺。富咸上年10月英超0比2不敵車路士，主因係太早失波，相信佢哋吸取教訓之後，今仗再鬥車仔，應該會打醒十二分精神做好防守，有利開細。