捷球网-足球比分_篮球比分_即时比分直播_足球视频移动版

美洲金盃C組最後一輪生死戰，哥斯達黎加同馬提尼克將會展開大激鬥，上年有份出戰世盃決賽周嘅哥斯達黎加，要出線嘅話今場非勝不可，不過馬提尼克已經上晒力，進攻火力同樣唔講得笑，雙方為爭最後一個出線席位打甩髀，預計開2.5球嘅入球大機會極高。（無綫myTV聽SUPER周三早上8時30分直播）

哥斯達黎加今屆以老帶新，祖爾甘保、施素波格斯、法蘭斯高卡禾、祖安華加斯、基舒亞富拿等骨幹都有份踢上年世盃決賽周，雖然今屆頭兩輪賽事只得1分，但唔可以低估呢支球隊嘅決心同能力，佢哋喺卡塔爾世盃分組賽最後一輪，被一致睇死下同德國大戰，最終以2比4奮戰落敗，但就贏盡球壇名宿及球迷嘅掌聲。

過去12屆最少入8強

哥斯達黎加屬金盃傳統勁旅，過去12屆最少都能夠晉級8強，今場形勢上佢哋一定要贏波先有機會出線，球員肯定會盡地一煲搶攻，尤其哥斯達黎加近4次對馬提尼克，全部贏晒兼入至少2球，自知實力比對手優勝，今仗更加會無後顧之憂咁去搶攻。

馬提尼克今屆有令人驚喜表現，首場分組賽踢少1個下，2比1擊敗薩爾瓦多，上輪面對勁旅巴拿馬亦咬得緊湊，奮戰下1比2落敗，呢支有唔少喺法國搵食球員嘅球隊進攻力唔差，近5場比賽有4場總入球開3球或以上，今場相信會同哥斯達黎加鬥攻，捧2.5球大盤穩陣。