今晚繼續有意大利盃8強，AC米蘭主場迎戰羅馬，兩隊不約而同剛於上場聯賽經歷惡鬥，匆匆再踢盃賽，球員未必回得切氣，可能會歎慢板，留前鬥後。睇番AC米蘭各項賽事，近6次主場出擊有5次總入球開2球或以下，包括聯賽同羅馬打和1比1，最好揀中位數2.5球嘅入球細。（周四凌晨4時開賽）文:Mic少

主隊前線把握力差
「紅黑兵團」上月初由葡萄牙名帥沙治奧干斯卡奧接手執教後，曾有不俗演出，並奪得意超盃冠軍，但「蜜月期」已過，近5場比賽僅2勝，上場意甲「米蘭打吡」一度領先國際米蘭，但補時被逼和1比1，難免打擊士氣。A米最大問題係鋒線球員把握力差，往往要靠中場雷恩達斯入波，攻力打折扣，加上疲兵上陣，要入波亦非易事。

至於羅馬上年11月底由73歲老帥雲尼亞里領軍後，已漸入佳境，上場意甲更加逼和榜首拿玻里1比1，球員鬥志十足。「雲爺爺」屬於意大利傳統教練，擅長使用穩守突擊戰術，相信唔會同AC米蘭鬥攻。加上意大利盃8強一場決勝負，更加會以穩陣行先，入球細值博。