意甲兩支爭標球隊今晚分途出擊，榜首拿玻里先作客科木。雙方排名雖有一定距離，但由西班牙名宿法比加斯執教嘅科木攻力唔曳，經常製造驚喜；拿玻里為鞏固1哥位置，作客亦會主攻求勝，佢哋近6場聯賽作客，有5次總入球開3球或以上，一於博中位數2.5球嘅入球大。（周日晚7時30分開賽）文:Mic少

拿玻里近況稍見回落，連續3場和波後，今輪賽前僅領先次席國際米蘭2分，嚟緊都冇乜失分空間，造訪科木正係重返勝軌大好時機，預料會全力搶攻。拿玻里中前場擁有盧卡古、麥湯米尼及森保安古沙等猛將，要入波唔難，首循環就曾擊敗科木3比1，不過教頭干地始終未能改善球隊防線問題，近5場聯賽都有失波，要保清白身有困難。

阿特蘭大遇弱等開餐
佔主場之利嘅科木上仗擊敗費倫天拿，總算結束3連敗頹勢，呢支新升班球隊遇上強隊唔會死守，早前主場對阿特蘭大同祖雲達斯，都能夠取得入球，有利出現入球騷。

另一場3哥阿特蘭大作客護級球隊安玻里，阿特蘭大喺歐聯出局後，自然更專注聯賽爭標，佢哋現時落後拿玻里5分，今場3分志在必得，加上近9場聯賽作客獲7勝2和佳績，有力反客為主。反觀安玻里近10場聯賽錄得2和8負差劣成績，單計近3場全輸2球或以上，頹到「冇朋友」，直取阿特蘭大讓球客勝「-1」。（周一凌晨1時開賽）