今晚英足盃第4圈重頭戲，阿士東維拉主場火併熱刺。兩隊今季成績較預期失色，盃賽自然機不可失，特別係熱刺聯賽愈跌愈低，目標放晒喺盃賽身上，雙方近期對碰經常球來球往，今場都唔會例外。文:謝德謙

維拉今季多線作戰，搞到演出表現不穩，上場聯賽作客不敵狼隊，主力射手奧尼屈堅斯食白果，今場面對熱刺為求晉級，首要任務係改善入波能力，加上佢哋冬季轉會窗有多位新兵來投，球員為爭正選必定落力表現。不過維拉近5場比賽都有失波，今場面對熱刺都幾難保持清白之身，倒不如以攻代守。

近4次交手入波多
熱刺主帥普斯迪高路向來崇尚進攻，以孫興民及古路施夫斯基為首嘅鋒線，要攻破維拉近期不濟嘅防線，相信只係時間問題。睇番雙方近4次交手入球甚多，球迷有望欣賞入球騷。