今日下晝有場澳職獨腳戲，FC麥克阿瑟主場鬥西部聯。FC麥克阿瑟唔單止狀態飄忽，主場成績亦冇乜保證，撞正客強主弱嘅西部聯更顯蝕底，平手盤一於撐客隊西部聯。（無綫myTV SUPER周日下午2時直播）文:法達斯維

FC麥克阿瑟近6場只得3勝3負，仲呈現「單跳」走勢，表現極不穩定。佢哋今季特點係主場演出欠佳，自從開咧戰大勝珀斯光輝，之後7次主場出擊，只得1勝2和4負，其中3場敗仗都係先入波之下反輸畀對手，毫無地利可言，就算上次主場擊敗墨爾本城，亦不宜高估。

指宿洋史作客腳風更順
另邊廂，西部聯出晒名作客勁過主場，今季踢咗15輪聯賽累積25分，主場攞得9分兼入得8球咁大把，相反客場錄5勝1和2負袋走16分，而且狂入20粒，係澳職客場入波最多球隊，單計近6場作客就獲得5勝1負，「惡客」之名當之無愧，當中日本射手指宿洋史今季所入嘅7球中，有5球來自客場，可見一斑。睇埋兩軍近8次碰頭，西部聯只係輸過1場，絕對唔赦FC麥克阿瑟，平手盤必撐客軍。